ወጣቶች ለካንሰር ከሚዳርጉ ሱሶች ራሳቸውን በማራቅ የበሽታውን መስፋፋት እንዲገቱ አሶሴሽኑ ጠየቀ

giving-up-the-tobacco-habit-300x222ወጣቶች ለካንሰር ከሚዳርጉ ሱሶች ራሳቸውን በማራቅ የበሽታውን መስፋፋት መግታት እንደሚጠበቅባቸው የኢትዮጵያ ካንሰር አሶሴሽን አሳሰበ፡፡ በአዲስ አበባ የካንሰር በሽታን የመመዝገብ ሥራም ተጀምሯል፡፡

የአሶሰሴሽኑ የቦርድ ሰብሳቢ ዶክተር ቦጋለ ሰለሞን የአሶሴሽኑ ዘጠነኛ ጠቅላላ ጉባዔ ዛሬ ሲካሄድ እንዳሳሰቡት የአገር ተረካቢ የሆኑት ወጣቶች ለካንሰር ከሚያጋልጡ እንደ ሲጋራ ካሉ ሱሶች ራሳቸውን ማራቅ ይገባቸዋል፡፡

ካንሰር የማኅበሰረብ የጤና ጠንቅ እንደመሆኑ መጠን፤ ኅብረተሰቡ በተለይ ወጣቱ ለበሽታው የሚኖረውን ተጋላጫነት ከሱስ ራሱን በማጽዳት እንዲከላከል ጠይቀዋል፡፡

ከዚህ አንጻር አሶሴሸኑ ኅብረተሰቡ ስለካንሰር ያለውን ግንዛቤ ለማሳደግ የተቀናጀ እንቅስቃሴ እያደረገ መሆኑን ዶክተር ቦጋለ ገልጸዋል፡፡

ካንሰር ቀደም ባሉት ጊዜያት የበለጸጉ አገሮች ዋና የጤና ሳንካ ተደርጎ ይወሰድ የነበረ ሲሆን፣ ከቅርብ ዓመታት ወዲህ ግን በሽታው በታዳጊ አገሮችም ስፋቱ እየጨመረ በመምጣት ላይ ይገኛል፡፡

በመሆኑም የካንሰር በሽታን ለመከላከል መንግሥት ከሚያደርገው ጥረት ባሻገር፤ የኅብረተሰቡና የባለድርሻ አካላት የተቀናጀ ጥረት መጎልበት እንደሚገባው አስገንዝበዋል፡፡

የኢትዮጵያ ካንሰር አሶሴሽን ዋና ሥራ አስኪያጅ አቶ ሀብታሙ በለጠ በበኩላቸው ካንሰር የማኅበረሰቡ ዋና የጤና ችግር እንዳይሆን ለመከላከል አሶሴሽኑ ሰፊ ሥራ እየሰራ ነው ብለዋል፡፡

በተለይ ካንሰር በኅብረተሰቡ ማህበራዊና ኢኮኖሚያዊ ሕይወት ላይ የሚያሳድረውን አሉታዊ ጫና በመገደብ የዜጎችን ጤንነት እንዲጠበቅ አሶሴሽኑ አስተዋጽ እያደረገ ነው ብለዋል፡፡

ይህ በእንዲህ እንዳለ የጥቁር አንበሳ ስፔሻላይዝድ ሆስፒታል በአዲስ አበባ ከተማ የካንሰር በሽታን ስፋት ለማወቅ ከኅዳር 2004 ጀምሮ እያካሄደ መሆኑን የኢትዮጵያ ካንሰር አሶሴሽን የቦርድ ሰብሳቢና የምዝገባው ፕሮጄክት አስተባባሪ ዶክተር ቦጋለ ሰለሞን ገልጸዋል፡፡

በእስካሁኑ የምዝገባ ሂደትም 1 ሺህ 400 ያህል የካንሰር ሕሙማን የተመዘገቡ ሲሆን፣ ከነዚህ ውስጥ የጡት ካንሰር ሕሙማን ይበዛሉ ብለዋል፡፡

ይህም በአገር አቀፍ ደረጃ የበሽታውን ስፋት በመለየት በሽታውን ለመከላከል የሚያስችል ሁኔታን የሚፈጥር ነው ብለዋል፡፡

በኢትዮጵያ ከካንሰር ዓይነቶች የሚበዛው የማህጸን ካንሰር መሆኑን በመስኩ የተደረጉ ጥናትና ምርምሮች ያስረዳሉ፡፡

በአገሪቱ የመጀመሪያ እንደሆነ የተነገረለት የካንሰር ሆስፒታል በ18 ሚሊዮን ብር ካንሰር ኬር ኢትዮጵያ በተባለ ድርጅት ለመገንባት በኦሮሚያ ክልል ቡራዩ ከተማ ትናንት የመሰረት ድንጋይ መጣሉ የሚታወስ የዘገበው ኢዜአ ነው።

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.