አረንጓዴ ተክሎችን ለስኳር ህመም

green-plate21አዘውትሮ አረንጓዴ ተክሎችን መመገብ ለስኳር ህመም ላለመጋለጥ እንደሚረዳ በቅርቡ የወጣን አንድ የምርምር ውጤት ዋቢ አድርጐ ዴይሊ ቴሌግራፍ ዘግቧል፡፡

የእንግሊዝ ተመራማሪዎች ይፋ ያደረጉት የጥናት ውጤት እንደሚያመለክተው በተለያዩ ስድስት አረንጓዴ ተክሎች ላይ ባደረጉት ጥናት በተለይ በፍራፍሬና አትክልት፣ ስፔናችና ጐመንን አዘውትረው የሚመገቡ ሰዎች ለስኳር ህመም የመጋለጥ ዕድላቸው ዝቅተኛ እንደሆነ ተነግሯል፡፡

በብሪታኒያ የህክምና መጽሔት ላይ ይፋ የሆነው የምርምር ውጤቱ አረንጓዴ ተክሎችንና ፍራፍሬን ከገበታቸው የማይለዩ ሰዎች የስኳር ህመም ሁለተኛ ለተባለው የመጋለጥ ዕድላቸው 14 በመቶ እንደሚቀንስ አመልክቷል፡፡

የጥናት ውጤቱ በበርካታ ምሁራን ይሁንታ ያገኘ ሲሆን ማንኛውም ሰው ፍራፍሬንና አረንጓዴ ተክሎችን ከዕለት ገበታው ባይለይ ለስኳር ህመም የመጋለጥ ዕድሉን ከመቀነሱም በላይ በሌሎች ህመሞች ላለመጋለጥ ስለሚረዳ በቀን ከሚወሰድ ምግብ ውስጥ አረንጓዴ ተክሎችን በስፋት መጠቀም ይገባል፡፡

የሌስተር ዩኒቨርስቲ ተመራማሪውና የዚህ ጥናት ቡድን መሪ ፕሮፌሰር ሚላኒ ዳቪስ በበኩላቸው የምርምር ሥራው ዋነኛ ትኩረት አረንጓዴ ተክሎች በሽታን የመከላከል አቅማቸውን ለማወቅ እንደ ነበር አመልክተው፤ በዚህም በተለይ የስኳር ህመምን በመከላከል በኩል ከፍተኛና አበረታች ውጤት መገኘቱን ተናግረዋል፡፡

ምርምሩ 220ሺ አዋቂ ሰዎችን ያካተተ እንደ ነበር የገለጹት ፕሮፌሰር ሚላኒ ዳቪስ፤ አረንጓዴ ተክሎችንና ፍራፍሬን አብዝቶ በመመገብ የሚመጣ ጉዳት እንደሌለና በተለይ አበባ ጐመንን የመሳሰሉት ተክሎች ውጤታማነታቸው ከፍተኛ መሆኑን ጠቁመዋል፡፡

/አዲስ ዘመን/

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.