ትዳር ለመመስረት ፍቅር ምን ያህል አስፈላጊ ነው

ስኬታማ ትዳር ከአንድ ሰው ጋር ደግሞ ደጋግሞ በፍቅር መውደቅን ይጠይቃል

 ጤና ይስጥልኝ     

በልጅነታችን ሁላችንም ፍቅር ካለ ሁሉ ነገር አልጋ በአልጋ ይሆናል የሚል ህልም ነበረን፡፡ እውነታው ግን ትዳር ቀላል የማይባል መመቻቸመች የሚጠይቅ ነገር መሆኑ ነው፡፡

ራጉዌል ዋልች

ፍቅርና ትዳር ልክ እንደ ጋሪውና ፈረሱ ኋላና ፊት ሆነው ነው የሚጓዙት የሚለው እምነት አሁንም ድረስ ሰፊ ቢሆንም ይህንን ሃሳብ የሚሞግቱ ሀሳቦች በአንፃሩ እየተጠናከሩ መጥተዋል፡፡ ይህንን ጥያቄ አፍታቶ ለመመለስ ጥልቅ ፍቅር (Profound Love) እንዴት ያለ ነው የሚለውን መረዳት ያስፈልጋል፡፡  

የቅርብ ጊዜ የፍቅርና ትዳር ትስስር

ትዳር ለመመስረት የጦፈ ፍቅር አስፈላጊ ነው የሚለው ድምፅ ጎልቶ መደመጥ የጀመረው ከቅርብ ጊዜ ወዲህ ነው፡፡ ስቴፋኒ ኮንተዝ ‹‹ይህ እሳቤ ከሁለት ክፍለ ዘመን ወዲህ የመጣ ነው፡፡ ሰወች ሁልጊዜ በፍቅር ይወድቁ ነበር፡፡ እርስበርሳቸው ይፋቀሩ ነበር፡፡ ይሁን እንጅ ፍቅር እንደ ቅድመ ሁኔታ የሚቀመጠው ከስንት አንዴ ነው›› ይላል፡፡ ኮንትዝ ቀጠል አድርጎ ‹‹ፍቅር የትዳር የጎንዮሽ ተፈላጊ ውጤት እንጅ ወደ ትዳር መግቢያ ቅድመ ሁኔታ ተደርጎ በብዙ ባህሎች አይታሰብም ነበር›› ብሏል፡፡

በተመሳሳይ ሁኔታ ፓስካል ብሩክነር የሚከተለውን ይላል ‹‹ትዳር በብዙ ባህሎች ውስጥ የተቀደሰ ትስስር መሆኑ ይታመናል፡፡ ከዚህ ውጭ ፍቅር በኋላ የሚመጣ ከሆነ እንደ አንድ ተጨማሪ ቦነስ ይወሰዳል፡፡ አሁን አሁን ግን ትዳር ለመመስረት ፍቅር ቅድመ ሁኔታ ሆኖ በመቀመጡ ከትዳር ይልቅ ፍቅር ቅዱስ ሆኗል፡፡ በምትኩ ትዳር ሁለተኛ ደረጃን የያዘ ነው፡፡›› በዚህ ምክንያት በተለይም በምዕራቡ ዓለም የተጋቢዎች ቁጥር እየቀነሰ የመጣ ሲሆን የፍቺ እና ያላባት ወይም ያለ እናት የሚመሩ ጎጆዎች ቁጥርም እያሻቀበ ነው፡፡

ትዳር ለመመስረት የጦፈ ፍቅር ቅድመ ሁኔታ ሆኖ በመቀመጡ የትዳር ዋጋ ከፍ ብሏል፡፡ ይህም ትዳር የብዙዎች ቀዳሚ አጀንዳ እንዲሆን አድርጎታል፡፡ ይህ በእንዲህ እንዳለ ግን ይሄው ዓይነት ፍቅር መልሶ ትዳርን መቅኖ ቢስ አድርጎታል፡፡ የጦፈ ፍቅር የለም በሚል ምክንያት ባለትዳሮች እና ጥንዶች መለያየትን እንደ ሁነኛ አማራጭ ተያይዘውታል፡፡

ትስስሩን መቃወም

    ፍቅርን እንደ ትዳር መሰረት ስናስብ ሁለት አይነት የተቃውሞ ሀሳቦች ይነሳሉ፡፡

  1. ትዳር ከፍቅር በተጨማሪ ሌሎች በርካታ ነገሮችን ግምት ውስጥ እያስገባን የምንኖርበት ማዕቀፍ ነው፡፡
  2. የጦፈ ፍቅር አጭር ጊዜ ብቻ የሚቆይ በመሆኑ በረጅም የጊዜ ሂደት የሚመጡ የፍቅር ሌሎች ገፅታዎች ይበልጥ ግንዛቤ ውስጥ ሊገቡ ይገባል፡፡

     የመጀመሪያው ሙግት ትዳር በአንድ አይነት ማህበረ ኢኮኖሚያዊና ባህላዊ ስርዓት ውስጥ የሚኖር ቁርኝት እንደ መሆኑ መጠን የጥንዶቹ አጠቃላይ ደህንነት ይህንን ትስስር ከግምት ያስገባ መሆን አለበት የሚል ነው፡፡ ሁለተኛው የመከራከር ሃሳብ በሌላ በኩል የጦፈ የሚባለው ፍቅር አይነት ያልተረጋጋ እና ለውስን ጊዜ ብቻ ደስታ የሚሰጥ መሆኑ ላይ ነው፡፡ ይህ ደግሞ ለረጅም ጊዜ የተረጋጋ ህይወት ምንጭ ሊሆን ከሚችለው ትዳር ጋር ይጋጫል፡፡ እነዚህ ሁለት መከራከርያ ሃሳቦች ሲጨመቁ ትዳር በሚመሰረትበት ወቅት ለፍቅር ብቻ ቅድሚያ የሚሰጥ ከሆነ መጨረሻው ‹‹ሲያልቅ አያምር›› ይሆናል የሚል ነው፡፡

     ትዳር ከፍቅር ውጪ የሚያሰኛቸው ሌሎች በርካታ ጠቀሜታዎች እንዳሉት ግልፅ ነው፡፡ በመሆኑም ትዳር ሲመሰረትም ሆነ የመፍረስ አደጋ ሲያንዣብብበት እነዚህን ከጦፈ ፍቅር ውጪ የሚገኙ ተጨማሪ ሁኔታዎችንም ያገናዘበ መሆን አለበት፡፡ ለምሳሌ ትዳር ሲመሰረት ጥንዶቹ በጋራም ሆነ በተናጠል ቤት ውስጥ የሚያስፈልጉ ነገሮችን ማሟላትና እና ጥሩ ወላጅ መሆን መቻላቸው በቀዳሚነት ሊነሳ የሚችል ጉዳይ ነው፡፡ እውነትም በታሪክም ቢሆን ትዳር የጥንዶችን ጤናና ሃብት የሚያሻሽል ቢያንስ ቢያንስ እንኳን የማይጎዳ እንደሆነ ነው የሚታመነው፡፡ ለፍቅር ብቻ ሲሉ ትዳር መመስረት ግን ጥንዶቹ እነዚህን ተጨማሪ ገፅታዎች እንዳይመለከቱ ሊያደርጋቸው ይችላል፡፡ እንደውም እንዲህ የሚነበብ አባባል አለ፡፡ ‹‹ለጦፈ ፍቅር ብቻ ሲሉ የሚጋቡ ጥሩ ምሽቶችን እና መጥፎ ቀኖችን ያሳልፋሉ››፡፡

 ትስስር መፍጠር

     በፍቅር እና ትዳር መካከል ትስስር ለመፍጠር በጊዜያዊ የጦፈ ፍቅር ስሜት እና ዘለቄታ ባለው ጥልቅ ፍቅር መካከል ያለውን ልዩነት መገንዘብ ያሻል፡፡

     ጥልቅ ፍቅር እንደጊዜያዊ የጦፈ የፍቅር ስሜት ለተወሰነ ጊዜ ብቻ ያህል የሚጎበኘንን ጠንካራ የመፈለግ ስሜት ብቻ ሳይሆን አመለካከታችንን እና ጠባያችንን ዘለቄታ ባለው መንገድ ይቃኛል፡፡ ጠንካራ የሆነ ስሜታዊ ወሲባዊ ፍላጎት ብልጭታ ለተወሰነ ጊዜ ውስጣችን ይቆይ ይሆናል፡፡ በአንፃሩ ጥልቅ ፍቅር ግን ያለማቋረጥ እያበራ ስሜታችንን ያሞቃል፤ ጠባያችንን ያንፃል እንዲሁም ከጊዜ እና ቦታ ጋር የሚኖረንን ቁርኝት መልክ መልክ ያስይዛል፡፡ የጦፈ የፍቅር ስሜት የሚያሳየው አጭር ጊዜ የሚቆይ የስሜት ኃያልነትን ብቻ ነው፡፡ በሌላ በኩል ጥልቅ ፍቅር ግን በረጅም የጊዜ ሂደት ውስጥ የሚፈጠርን፣ በሁሉም መልኩ የሚያበራን የሁለቱንም ጥንዶች ህይወት እንዲያብብ እና እንዲያፈራ የሚያደርግ ፍቅር ነው፡፡ ጥልቅ የሆነ የፍቅር ህይወት ጥብቅ ከሆነ ጊዜአዊ ስሜት የተለየ ነው፡፡ የአፍታ ወሲባዊ ፍላጎት ከዘመናዊ የፍቅር ህይወት በላይ ጥብቅ ሊሆን ይችላል፡፡ ይሁን እንጅ ጥልቀቱ እዚህ ግባ የሚባል አይደለም፡፡

     ለጦፈ ፍቅር ብቻ ሲባል ትዳር መመስረት በ3 ምክንያት ብልህ ውሳኔ አይደለም፡-

  1. ፍቅር የሚለዋወጥ ስሜት ነው፡፡
  2. ፍቅር ብቻውን ጠንካራ መሰረት ሊሆን አይችልም፡፡
  3. ከፍቅር በተጨማሪ ሌሎች በርካት ነገሮች ያስፈልጉናል፡፡

      የአንድን ሰው እንበልና አእምሮአዊ ብቃቱን ወይም ደግነቱን ግምት ውስጥ ሳያስገቡ ወይም ደግነቱን ግምት ውስጥ ሳያስገቡ ትዳር መመስረት ለጊዜው አፍቃሪ ውሳኔ ሊወስን ይችላለ፡፡ ነገር ግን በረጀም ጊዜ አብሮነት ውስጥ ዋጋ ባላቸው ማገናዘቢያወች ሲፈተሽ አስፈሪ ውሳኔ መሆኑ ግልፅ ይሆናል፡፡

      ትዳር ለመመስረት በምንነሳበት ወቅት ፍቅር ቦታ ሊኖረው ይገባል፡፡ ይሁን እንጂ የዛሬው ሆነ የወደፊት ህይወት ደስታ አና ትርጉም ጊዜአዊ የጦፈ የፍቅር ስሜት ላይ ብቻ ሊመሰረት አይገባም፡፡ ይልቁንም መተሳሰብን፣ መመሳሰልን፣ መጋራትን፣ እና በመጠኑም ቢሆን ስሜታዊ መፈላለግን መሰረት ያደረገ ጥልቀት ያለው ፍቅር ላይ ሊደገፍ ይገባል፡፡ ስኬታማ ትዳር ከአንድ ሰው ጋር ደግሞ ደጋግሞ በፍቅር መውደቅን ይጠይቃል፡፡

 

 

           

1 COMMENT

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.