ወሲብ ቀስቃሽ ምስሎችና ጽሑፎች ከስነልቦና አንፃር

በአለሙ ታዬ

በዛሬው ጊዜ ወሲብ ቀስቃሽ ምስሎችና ጽሑፎች ከመቼውም ጊዜ ይበልጥ በጣም ተወዳጅ አልፎ ተርፎም በቀላሉ የሚገኙ ሆነዋል። በሞባይል የኢንተርኔት አገልግሎት ማንኛውም ግለሰብ እንደፈለገው ያገኛቸዋል። የፆታ ስሜቱ እስኪቀሰቀስ ድረስም አንዲትን ሴት በምኞት ወክሎ ከእሷ ጋር በስሜት ይነጉዳል። ይሄ ድርጊት በተደጋጋሚ ሲፈፀም የስነ ልቦና ቀውስ ውስጥ መዘፈቅን ያስከትላል። በዚህ ሱስ የተጠመዱ ሰዎች ለወንጀለኛነት የቀረቡ ይሆናሉ።

sex-addiction-counselor1ልቅ የፍትወት ፊልም (ፖርኖግራፊ) ትልቅ የገንዘብ ምንጭ ሆኗል፤ በሰው ሕይወት ውስጥ ምንም ዓይነት ችግር ያምጣ ቅንጣት ግድ ሳይኖራቸው ገንዘብ ለማጋበስ ሲሉ ብቻ የሚያመርቱት ምርት ነው። እንደገና ተመላልሰው ከነርሱ መግዛት እንዲችሉና እስከመጨረሻ እንደባሪያ ሊገዙ ስለሚፈልጉ ሰዎች ማየት የሚፈልጉትን ሁሉ ከማዘጋጀትና ከማምረት አይሰንፉም።

ከአሥር ዓመት በፊት ኒውዮርክ ታይምስ በሜይ 20, 2001 ዓ.ም በወጣው ዕትሙ ላይ “ባለእርቃኖቹ ካፒታሊስቶች” በሚል ርዕስ ባወጣው መረጃ፥ በአሜሪካ ውስጥ በተደረገው አሰሳ በአንድ አመት ብቻ ከአስራ አንድ ሺህ በላይ በሚሆኑ የልቅ ፍትወት ርዕሶች ፊልሞች ተዘጋጅተው መሰራጨታቸውን ይፋ አውጥቷል።

እንደዚሁም በዚሁ ዓመት በታወቀው የሆሊውድ ፊልም ዝግጅት ውስጥ ከአራት መቶ በላይ በሚሆኑ ርዕሶች የልቅ ፍትወት ፊልሞች ተዘጋጅተው መሰራጨታቸውን የተደረገውን ጥናት ዋቢ አድርጎ ዘገባው አስቀምጦታል። በተመሳሳይ ዓመት ሰባ ሺህ የሚሆኑ የልቅ የወሲብ ድረገጾች ተዘጋጅተው የዓለምን አየር በመሙላት እየናኙበት መሆኑን ማወቅ ምንኛ አስደንጋጭ ነው!      

ይህ መረጃ ከአሥር ዓመት በፊት የነበረውን መረጃ የሚያሳይ ቢሆንም ዓለም በዚህ አንጻር እንዴት ወደ ጥፋት እየገሠገሰች እንደሆነ ለማመላከት በቂ ፍንጭ እንደሆነ ግልጽ ነው። እንዲሁም መረጃው ከአሥር አመት በፊት የነበረውን አሃዝ ሲያሳይ ዛሬ ደግሞ ከአሥር ዓመት በኋላ ምን ያህል በሚያስደነግጥ ሁኔታ እንደሚጨምር ለመገንዘብ ብዙ ዕውቀት አይጠይቅም።

የወሲብ ቀስቃሽ ምስሎችናጽሑፎች ኃይል

ለሕሊና ደህንነት አስፈላጊና ዋና የሚባለው ክፍል ጤናማ በሆነ የወሲብ ሃሳብ ውስጥ መገኘት ነው። እነዚሀ ጤናማ ሃሳቦች መበከል ሲጀምሩ የማንነታችን መገለጫዎች የሆኑ አቋሞቻችን መጣመም ይጀምራሉ። የልቅ ፍትወት ዓለም ባሕልና ፍልስፍና ፍትወት ፥ ፍቅርና መቀራረብ አንድ ናቸው ብሎ ይነግራል።

በልቅ ፍትወት ዓለም ሰዎች ከማያውቁት ሰው ጋርና እንደው በአጋጣሚም ካገኙት ጋር ልቅ ወሲብ ይፋጽማሉ። ዋናው ቁም ነገር ሆኖ የሚወሰደው በጊዜው የሚገኘው ቅጽበታዊ ደስታና ርካታ ብቻ ነው። ወሲብ ከማን ጋር ላድርግ? ለዚህም ርካታዬ የማንን ገላ ወይንም ሰውነት ልጠቀም? የሚለው ጥያቄ ምንም ከቁጥር የሚገባ ጉዳይ አይሆንም። ልቅ የፍትወት ፍልስፍና ወሲብን በማንኛውም ጊዜ፥ ቦታና ከማንኛውም ሰው ጋር ውጤቱ በመጨረሻ ምንም ይሁን ብቻ መፈጸም እንደሚቻል ነው የሚነግርዎት።

የፖርኖግራፊ ችግር የሚጀምረው የሚያራምደው ጥልቀት የሌለው አስተሳሰብ ወሲብ በመተማመን በቃልኪዳንና በዕውነተኛ መሰጠት እንዲሁም እርስ በርስ በመፈቃቀድና በዕውነተኛነት መካሄድ እንዳለበት ከመቀበልና ከመተግበር ይልቅ እንደተፈለገው ልቅ በሆነ ሁኔታና ዐውድ መከናወንን ማደፋፈሩ ነው።

እሳትን በእሳት ማንደጃ በተገቢው ቦታ መጠቀም ሙቀትም ሌሎችም ጥቅሞች እንዳሉት ሁሉ፣ ወሲብን በተገቢው መንገድና ዐውድ መጠቀም አስደናቂና ውብ ነው። ይህ ትክክለኛው ዐውድ ከልብ በሚዋደዱና እርስ በርስ በተቀባበሉ፥ እንደዚሁም በዕውነተኛ ፍቅርና ፈቃድ አንዳቸው ለአንዳቸው ራሳቸውን በሰጡ፥ እስከ ሕይወታቸው ፍጻሜ ድረስ አብረው ለመቆየት በወሰኑ በሁለት ወንድና ሴት መካከል ወሲብ በሚከናወንበት ጊዜ በጣም ፍጹምና ታላቅ ርካታና ደስታ ይገኝበታል።

ከምትመለከቱት የልቅ ፍትወት ከቶም ቢሆን የምትማሩት አንዳችም እውነት የለም። ከእውነት ጋር በጣም የተቃረነ አካሄድ ስላለው ፈጽሞ ቁምነገር ሊገኝበት የሚችል ነገር አይደለም። በመሠረቱ ልቅ የወሲብ ፊልም ለገበያ ቀርቦ ብዙ ገንዘብ ለመሰብሰብ ሲባል የሚዘጋጅ እንጂ ለትምህርት ተብሎ የሚዘጋጅ አይደለም። ስለዚህ ልቅ የወሲብ ፊልም ብዙ ውሸቶችንና ቅጥፈቶችን አቀናባብሮ የተመልካቾችን ቁጥር ማብዛት ከዛም ሽያጭን በተቻለ መጠን ማሳደግና ሰውን ሕይወቱንም ቦርሳውንም በዝብዞ ማራቆት ነው።

ፖርኖግራፊ እጅግ እንደ አሸን የፈላው፤ ስለወሲብ ስለሴቶች፤ ስለጋብቻና ስለሌሎቸም ተያያዥ ጉዳዮች ፈብርኮ በሚያወጣቸው ቅጥፈቶች ስለሚታገዝ ነው። የሰዎችን ዝንባሌ፤ አስተሳሰብና ሕይወትን ለመበከል ከሚጠቀሙባቸው ቅጥፈቶች በርካታ ናቸው።

“ፕሌይ ቦይ” ተብሎ በሚጠራው የፍትወት መቀስቀሻ መጽሔት ውስጥ ሴቶችን ትንሽ ደስ የምትል ለመጫወቻ የምትሆን ዓይነት እንስሳ አድርጎ ነው የሚያቀርባቸው፤ “ፔንት ሀውስ” የሚባለው መጽሔት ደግሞ ሴቶችን ለቤት ውስጥ መጫወቻና መዝናኛ የሚሆኑ ልክ እንደ ድመትና እንደውሻ (እንደ ቤት ውስጥ እንስሳ) አድርጎ ነው የሚቆጥራቸው። ወይንም እንደ አንድ የሰው አካል አንድ ክፍል ብቻ አድርጎ ነው የሚቆጥራቸው። አንዳንድ የልቅ ፍትወት ፊልሞች ላይ ሴቶች ፊታቸው ሳይታይ ኃፍረተ ሥጋቸው ብቻ እንዲታይ በማድረግ ያቀርቧቸዋል። ይህን የሚያደርጉት ምን ዓይነት አስተሳሰብ ለማራመድ መሰላችሁ? ሴቶች ሰብዐዊ ናቸው ሆኖም ለስሜት ማርኪያና መጫወቻ አሻንጉሊት ሆነው ብቻ የተፈጠሩ ናቸው የሚለውን አስተሳሰብ በሰው ህሊና ውስጥ ለመቅረጽ ነው።

አንዳንድ የስፖርት መጽሔቶች የመዋኛ ልብስ ላይ ብቻ የሚያተኩር ዕትም አላቸው። ይህም በቀላሉ የሚያሳየው ሴቶች ሰብዓውያን ሳይሆኑ በቃ ልክ እንደ አንድ የስፖርት ዓይነት እንደሚታዩ ነው። ልቅ የፍትወት ፍልስፍና ወሲብን እንደ ስፖርት ውድድር አድርጎ ያሳያል፤ በውድድርም አሸናፊና ተሸናፊ እንደሚኖር ሁሉ ወንዱ ራሱን አሸናፊ መሆኑንና አለመሆኑን እንዲመዝንበትና አሸናፊነቱን እንዲኩራራበት ያደፋፍረዋል። ስለዚህ ወንዱ ከስንት ሴት ጋር እንደተኛ፣ ከተኛቸውም ሴቶች ጋር ያደረጋቸውን ነውሮች በማሰላሰል እንዲመሰጥና ራሱን ለዚህ ልቅ ለሆነ ልምምድ እንዲያስገዛ ለማድረግ ታስቦ ነው የተዘጋጀው። ወንዶች ማንነታቸውን የሚፈትኑትና የሚመዝኑት ስንት ሴቶችን ድል በማድረግ ወሲብን በመፈጸማቸው ይሆናል።

በተለይም የፖርኖግራፊ ማስታወቂያ ዕቃን ለማሻሻጥ በሚያስደንቅ ሁኔታ የሴትን ስብዕና ከማጉደፍም አልፎ ቃላት በማይገኝበት ሁኔታ በማቅረብ በዚህ ንግድ ለተሰማሩ ጥቂት ግለሰቦች የሃብት ምንጭ ሆኗል። ይኸው የረከሰ አመለካከት ነው ድንበርና አየር ሳይገድበው አልፎ ተርፎ መጥቶ ዛሬም በየሃገሩ በዝሙት አዳሪነት የተሰማሩትን ሴቶች ወንዶች እንደ ሸቀጥ ገንዘብ ከፍለው በመውሰድ ከሰብዐዊነት ውጭ ሊጠቀሙባቸው የሚፈልጉት። ለምን ቢባል እንደማንኛውም ሸቀጥ ዋጋ ተከፍሎባቸዋል።

በፖርኖግራፊ ገበያ አይነ ግቡ የሆነ የሰውነት ቅርጽ የሌላት ሴት ትናቃለች፣ ትጠላለች። እንደነዚህ ዓይነት ሴቶችን ውሾች፣ ዓሣነባሪዎች፥ አሣማዎችና ከዛም የባሰ ስም ይሰጧቸዋል። ምክንያቱም ለልቅ ወሲብ ፊልም ንግድ እነርሱ ያወጡትን የውበት መመዘኛ ለማሟላት ስላልቻሉ ብቻ ነው እንዲህ ተብለው የሚጠሩት። ልቅ ፍትወት ስለሴቶች ክብረህሊናና ስብዕና ምንም ግድ የለውም፤ የሚፈልገው ጥሩ ገበያ ይኖረዋል ብሎ የሚያስበው ገላዋን ብቻ ነው።

የፖርኖግራፊ ዝግጅት ፍልስፍና ሴቶች “እምቢ” ማለታቸው በተዘዋዋሪ መንገድ “እሺ” ማለታቸው ነው ብሎ ነው የሚደመድመው፤ በዚህ የፊልም ዝግጅታቸው ውስጥ ሴቶች ሲደበደቡና ሲደፈሩ፣ በሚያሰቅቅ ሁኔታ ሥቃይ ሲቀበሉ ያሳያሉ፤ በመጨረሻ እነዚያው ሴቶች ያለፉበትን ሁኔታ ሁሉ ልክ እንደወደዱት አድርገው እንዲተውኑ ያደርጓቸዋል። ስለዚህ ይህ አሰራር ወንዶችን ለማዝናናትና ርካታን እንዲያገኙ ለማድረግ ሴቶችን ማሰቃየትና እንደፈለጉ ቢያደርጓቸው ምንም አይደለም የሚል መልዕክት ያለው ነው።
ልቅ ፍትወት ፊልም በሴቶች ላይ የተደረገ ጥላቻና ንቀትን የታጀለ ንግግር የሞላበት ነው። በፊልሞቹ ውስጥ ሴቶች ስቃይ ይቀበላሉ፣ በንቀት ይተፋባቸዋል። በመቶ በሚቆጠሩ ዘግናኝ መንገዶች ክብራቸውን በሚገፍፍ ሁኔታ ይሰቃያሉ። የሚያሳዝነው ግን ይህን ሥቃይ የሚቀበሉ ሴቶች የበለጠ እንዲያሰቃይዋቸውና እነዲያጎሳቁሏቸው ሲለምኑና ይህንን ጉስቁልና እንደሚወዱት አድርገው እንዲተውኑ ያስገድዷቸዋል። ይህን ሁሉ ነገር የተመለከተ ወንድ ምን ያህል ለሴቶች ክብር ይኖረዋል? ሴቶችን ከልቡ ማፍቀርስ እንዴት ይችላል?
የልቅ ፍትወት ትልቁ ገበያ የሚያተኩረው ሴቶች “ሕጻናትን” ተመስለው የሚፈጽሙት ልቅ ወሲብ ነው። ትልቅ ሴት ነች፣ እንደ ህጻን ሴት እንድትለብስና የህጻን ዓይነት ጫማ እንድታደርግ፣ ጸጉሯን እንደ ህጻን ሴት እንድትሰራና የህጻናት የጸጉር ጌጥ ጸጉሯ ላይ እንድትሰካ፣ አሻንጉሊት እንድትይዝ ይደረግና፣ ልቅ የፍትወት ፊልም እንድትተውን ትደረጋለች። ይህ ምን መልዕክት የሚያስተላልፍ ይመስላችኋል? አዋቂዎች ህጻናትን ለልቅ ፍትወት ቢጠቀሙባቸው ምንም አይደለም የሚል አይደለም? ይህ አካሄድ እነዚህ የልቅ ፍተወት ፊልም አዘጋጆች ህጻናትንም ገና ከጠዋቱ ለዚህ ገበያቸው እያዘጋጇቸው እንደሆነ የሚያሳይ ነው።
ልቅ የፍትወት ፊልም ዝግጅት ሥራቸውን ይበልጥ የሚስብና በሱሷቸው የተጠመዱትን የበለጠ ለማስገበር ሲፈልጉ አብዛኛው የተውኔታቸው ታሪክ የሚያጠነጥነው ሕገወጥ ተግባርና ወንጀልን አስታክከው በመስራት ነው። ይህ ማለት ፍትወትን ማጣጣምና የበለጠ መርካት የሚቻለው በደንቡና በአግባቡ ስትፈጽመው ሳይሆን ሕገወጥ በሆነ መንገድና ከወንጀል ጋር ስትፈጽመው ነው የሚል መልዕክት ያስተላልፋሉ።
ልቅ የፍትወት ፊልም የዝሙት አዳሪነትን አስከፊና አስነዋሪ ገጽታ በሚያብረቀርቅ ቀለማት እየቀባባው ሌሎችን እያሳተ ወደዚህ አስነዋሪ ተግባር እንዲገቡ እያደፋፈረ ነው። ሐቁ ግን ፊልም ቀባብቶ እንደሚያቀርባቸው ዓይነት አይደለም፤ ብዙዎች እንደሸቀጥ ከየአገሮች ተገዝተው በባርነት ሥርዐት ውስጥ የሚገኙ መሆናቸውን የሚያውቅ የለም።
በዚህ ተግባር ላይ ተሰማርተው በልቅ ፊልም ዝግጅት ውስጥ ግንባር ቀደም ተሳታፊ ሆነው የሚታዩት ሴቶቸ አብዛኛዎቹ በቅርብ ዘመዶቻቸውና በጎረቤቶቻቸው የመደፈር ዕጣ የደረሰባቸው፣ አንዳንዶቹ ደግሞ በግብረሥጋ ግንኙነት የተነሳ ተላላፊ በሆኑ በማይድኑ በሽታዎች የተያዙ፣ አንዳንዶቹም በያዛቸው የግብረሥጋ ግንኙነት በሽታ የተነሳ በወጣትነታቸው ሕይወታቸው ያለፈ፣ ብዙዎቹ የሚያልፉበትን አስጨናቂና አስቀያሚ ልምምድ ለመርሳት ሲሉ በኃይለኛ አደንዛዥ ዕጽ ሱሶች የተለከፉ ናቸው።

የልቅ ፍትወት ፊልሞች የሚያደርሱት ተጽዕኖዎች

ልቅ የፍትወት ፊልሞች በሕሊናችን ውስጥ ማስቀመጥ የሚፈልጉት ምን ዓይነት ሃሳቦችን ነው? መጥፎ ነገር በሕሊናችን ውስጥ ልክ እንደቆሻሻ መጥቶ ከተዘረገፈ፣ ሕሊናችን አስተሳሰቡ ሁሉ ይበከልና የጤናማ ሃሳብ ችግር እጦት ስቃይ ውስጥ እንገባለን። ሕሊና ደህንነቱ በሚገባ እንዲጠበቅ አስፈላጊ ነው የሚባለው ዋና ነገር ጤናማ በሆነ የወሲብ ሃሳብ ውስጥ መገኘት ነው። ይህ ጤናማ ሃሳብ ከውጭ ወደ ውስጥ በዘለቀ መርዛማ ሃሳብ ከተበከለ አስተሳሰባችን በአንድም ሆነ በተለያየ አቅጣጫ መጣመሙ አይቀሬ ነው። የአስተሳሰባችን አካሄድ የሚቃኘውም ከዛ አንጻር ይሆንና እንቸገራለን።

ልቅ የፍትወት ፊልምን ያየ ሁሉ ወዲያውኑ በሱሱ ይጠመዳል ማለት አይደለም። አንዳንዶች ቀድሞውኑ ሴትንና ወሲብን እንዲሁም ትዳርንና ልጆችን በተመለከተ የተመረዘ አስተሳሰብ በሕሊናቸው ውስጥ ተሞልተው ሊሆን ይችላል። አንዳንዶች ሁሉንም እንዳለ መቀበል የሚወዱ በቀላሉ ስሜታቸው ወደፈለገው የሚመራቸው ሰዎች ሊሆኑ ይችላሉ፤ የልቅ ፍትወት ፊልም አዘጋጅ ካምፓኒዎች እናንተ ማን ሁኑ ማን እነርሱ ግድ የላቸውም። እነርሱ የሚፈልጉት በዚህ ሱስ ወጥመድ ውስጥ ገብታችሁየምርቶቻቸው ጥገኛ እንድትሆኑ ብቻ ነው። ለነርሱ ትልቁ ጉዳያቸው ገበያቸውና ትርፋቸው ብቻ ነው።

ዶ/ር ቮክቶር ክላይን የተባሉ ምሁር ሱስ በውስጣችን ሊያድግ የሚችልባቸውን ደረጃዎች አስቀምጠዋል። ከነርሱም መካከል አራቱ የሚከተሉት ናቸው። በሱሱ መጠመድ፣ የሱሱ ፍላጎት ማደግ፣ ሱሱን በጣም የመላመድ ስሜትና በመጨረሻም በተግባር ውስጥ መውደቅ ናቸው። በተጨማሪ ደግሞ ከነዚህ ውጭ በልቅ የፍትወት ፊልም ሱስ ለመጠመድ ቀዳማይ ምክንያት የሚሆን ደረጃ አለ ፤ በልጅነት ጊዜ ለዚህ ፊልም መጋለጥ የሚለውን መጨመር ይቻላል። እስቲ እነዚህን ደረጃዎች በዝርዝር እንቃኛቸው።

በልጅነት ዕድሜ ለልቅ የወሱብ ፊልሞች የመጋለጥ ደረጃ

ብዙዎች በዚህ የልቅ ፍትወት ፊልም ሱስ የተጠመዱ ሰዎች ታሪካቸው ሲጠና ገና ከልጅነታቸው ጊዜ ጀምሮ ለዚህ ፊልም እይታ ስለተጋለጡ እንደሆነ ተደርሶበታል። ይህንን ልቅ የሆነ የወሲብ ፊልም ማየት የጀመሩት ገና በህጻንነታቸው ነው። የቤታቸውን ደፍ የረገጠው በሕይወታቸው ማለዳ ላይ ነው። ይህ በጣም አሳዛኝ ክስተት ነው።

በልቅ ፍትወት ሱስ የመጠመድ ደረጃ

በተደጋጋሚ የልቅ ፍትወት ፊልምን ማየት ስናዘወትር፣ ፍላጎቱ የሕይወታችን አንዱ ክፍል መሆን ይጀምራል፤ ስለዚህ በዚህ ወቅት ወጥመድ ውስጥ ገብታችኋልና በቀላሉ ከወጥመዱ መላቀቅ አትችሉም።

የሱሱ እያደገ መምጣት

አንዳንድ የልቅ ፍትወት ምሥሎችን በማየት ትጀምራላችሁ፤ ቀድሞ ያ የምታዩት እንዳላስጠየፋችሁና እንዳልጠላቸሁት ሁሉ አሁን ማድነቅና ራሳችሁንም በስሜት ውስጥ መሆን ትጀምራላችሁ።

ከሱሱ ጋር በጣም የመላመድ ደረጃ

በዚህ የሱስ ደረጃ ላይ ስታዩት የሚያስደንቃችሁ ምስል ስሜት አልሰጥ እያላችሁ ትቸገራላችሁ፤ በጊዜው ስታዩት ስሜት ውስጥ ሲከታችሁ የነበረው ምስል አሁን ምንም ስሜት አልሰጣችሁ ይላል። በዚህ የተነሳ መበሳጨት መነጫነጭ ትጀምራላችሁ። የበለጠ የሚያስደንቅ ፊልም እንዲመጣላችሁ ትፈልጋላችሁ፤ በቀላሉ አታገኙም፤ ይህም በባህርያችሁ ላይ ከባድ ለውጥ ማምጣት ይጀምራል።

የደረጃው ማደግ

ይህ በወንዶች ላይ የሚታየው እጅግ በጣም የሚያስደነግጠው ደረጃ ነው። በዚህ ደረጃ በሱሱ የተጠመደው ሰው በቀጥታ ያየውን በተግባር ለመግለጽ የሚፈልግበት ደረጃ ነው። አንዳንዶች በቀጥታ ተንቀሳቃሽ ፊልሙን ሳይመለከቱ ከሥዕልና ከፕላስቲክ ምሥሎች እይታ በኋላ በቀጥታ ወደተጨባጩ ዓለም ዘው ብለው ይገባሉ። ይህም ራሳቸውን ለጥፋት ከመዳረግ ባለፈ የሌሎችንም ሕይወት ወደ ጥፋት ይልካሉ።

ምን ማድረግ ይበጃል

        ባለሙዎቹ እንዲህ ይመክራሉ፡- የመጀመሪያው እርምጃ ፖርኖግራፊ ሱስ ጋር እያታገላችሁ እንደሆነ አምናችሁ ተቀበሉ። ብዙዎች የሚያልፉበት፣ ያለፉበትና እያለፉም ያሉበት ነገር ነው። በሚሊዮን የሚቆጠሩ ወንዶች በሱሱ ተለክፈው በተለያየ ደረጃ ላይ ይገኛሉ። በእርግጥም የሚያስደንቅ ክስተት አይደለም። የልቅ ወሲብ አምራች ኩባንያዎች እናንተን የመሳሰሉትን ለማጥመድ በቢሊየን የሚቆጠር ዶላር ማጥፋታቸውን አትርሱ። ምናልባትም አንዳንዶቻችሁ ከዚህ በፊት በሕይወታችሁ ባለፈ የወሲብ ትንኮሳ ምክንያት ወደዚህ ሱስ ተገፋፍታችሁ ይሆናል። ሆኖም ከዚህ በኋላ ራሳችሁን ከዚህ ቀንበር ነጻ ለማወጣት ብቻችሁን ለመታገል እንደማትችሉ ማወቅ አለባችሁ። እርዳታ ያስፈልጋችኋልና ባለሙያን ለማማከር ችላ አትበሉ።

source-www.sendeknewspaper.com

 

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.